!Buenos dias!

 
halló!!!
Ég var að fá sms af tal.is sem í stendur "Nennirdu ad hringja í mig. Gedveikt mikilvægt! SAS" Ég verð nú bara að játa að kannast ekkert við þetta og verð núna úber forvitin!!!!! Hjálp???

 
muuuu.....
Hvað er málið með þetta skítaveður, ég bara spyr??? Ég var sko ekki búin að panta snjó en þeim sem datt þessi vitleysa í hug verður hér með flengdur!!!!

 
jeddúddamía
ég lenti í alveg furðulegasta símtali áðan í vinnunni. Það var gömul kona sem hringdi og sagði "ég er hérna að horfa á discovery channel og það er hérna auglýsing fyrir Renault Sport Spider" Ég var alveg bara svona "jaaaáá..." hef nebbla ekki alveg heyrt um svona bíl en jæja og þá sagði hún "ég er alveg veik fyrir sportbílum þó ég sé nú orðin 76 ára" ég var bara svona "jájá" reyna að vera polite og svona og svo hélt hún bara áfram, spurði mig hvað ég væri gömul og sagði "Aldur er auðvitað bara svona state of mind, maður er bara eins gamall og maður leyfir sér að vera á meðan hausinn er í lagi" og hún hélt áfram og áfram og áfram. Sagði mér frá vinkonu sinni sem var alltaf að kvarta yfir hvað hún væri gömul og hvað hún ætti erfitt og svo fór hún að segja að dóttir hennar hefði nú einu sinni átt hyundai en hún væri nú dáin úr krabbameini... Maður veit nú varla hvað maður á að segja en reyndar kom ég nú ekki miklu að því hún fór svo að tala um hvað hefðu nú orðnar litlar framfarir í læknavísindunum. Hún væri nú alein eftir, ætti son einhvers staðar í útlöndum sem hún heyrði aldrei í og fór nú svo að spyrja mig hvort við ættum ekki einhverja svona Hyundai Coupe, ég reyndi nú að fá hana til að tala við einhverja sölumenn en hún var nú ekki á því og ætlaði nú bara að halda áfram að tala við mig og kíkja svo bara við með strætó á morgun..... en wait a minute sko því þá fór hún að segja mér að hún hefði nú bara klesst á um daginn í fyrsta skipti og skildi ekkert afhverju hún var í órétti... þrusaði inn í hliðina á einhverjum bíl. Ég sagði henni nú bara endilega kíkja á morgun sem ég efast stórlega um að hún geri!!!

...þetta er málið með gamalt fólk. Það er oft svo lonely en hefur bara engan til að tala við og hringir því í fólk út í bæ og segir því ævisögu sína. Eins og þessi kona, hún var nebbla bara nokkuð hress og fyndin á köflum, sérstaklega fannst mér fyndið þegar hún var með svona enskuslettur, ekki algeng fyrir konur á þessum aldri kannski en manni finnst ekki beint comfy þegar eitthvað fólk út í bæ er að segja manni frá dóttur sinni sem dó úr krabbameini og etc. Hvernig væri nú bara að koma upp svona chat line fyrir gamalt fólk, þar sem gamalt fólk getur hringt inn og fengið samband við annað gamalt fólk sem hefur ekkert annað að gera og veitir ekki af að kynnast einhverju fólki út í bæ. Maður gæti nú kannski bara grætt á þessari mögnuðu hugmynd, en núna er ég nottla búin að segja ykkur öllum frá henni........ daddara :)

 
ungfrúíslandpunkturis
Ég, Hrund og Dröfn horfðum á þessa "mögnuðu" keppni saman á laugardaginn og gæti ég ekki verið meira sammála henni RumpuStrumpu hérna um miss8! Hún var alveg awfull frá helvíti greyið. Ég var nú persónulega ekki alveg að ná þessum úrslitum og fannst mér dáldið skondið að miss3 hefði verið í playboy!!!!! Mér fannst hún nú vera með dáldið svona Dj. Sóley look sem mér finnst eitthvað einstaklega pirrandi týpa án þess að þekkja hana nokkuð. Hún er bara eitthvað svo mikið: "ahh.. ég er dj. sóley... váá". Lítur út fyrir að vera mesta gufa í heima en anyways þá fannst mér miss7 og miss4 langmestu pæjurnar....
en daddara nóg um það óverandát :)

 
eat, eat, eat....
Hubba hubba. Ég er nú búin að borða svo mikið um helgina að ég er bara orðin hálf sloj af áti.... En það var einmitt barnaafmæli á laugardaginn, svo var ég að hjálpa til í fermingu í gær (þannig að ég hef kannski bara brennt því öllu thíhí) og í vinnunni í dag fékk ég kökur bæði í morgun- og síðdegiskaffinu sökum afgangs úr fermingarveislu! And to top it all fékk ég pizza hut í gærkvöldi líka og stutt er í páskana sem snúast einmitt mikið bara um át og aftur át. Fæ meira að segja kannski kalkúnos á páskadag. Nammi nammi namm.

Ég náði nú að gubba út úr mér einu "listaverki" á laugardaginn og skissaði eitthvað í gær. Algjör snilld finnst mér að Neighbours skuli nú vera kl. 12 á sunnudögum (var kl. 17 áður). Drullufínt að vakna bara, kveikja á sjónvarpinu og horfa á tvær klukkustundir af heilalausu efni :) Annars var ég að skrá mig á leirlistanámskeið. Hlakka ekkert smá til :) Frétti af því í gegnum eina sem er með mér á Formfræði námskeiðinu og er því búin að missa af einum tíma en það er allt í lagi þar sem ég fæ að mæta einu sinni sjálf í staðinn og svo fær maður víst aðgang að vinnustofunni eftir að námskeiðinu lýkur, en þarf þá nottla að útvega sér leir sjálfur. Þetta verður örugglega algjör brakandi snilld og læt ég ykkur nú vita hvernig gengur og sodann.....

 
Óskarinn
Var nú bara að sjá það á mbl að Halle Berry og Denzel Washington hefðu hlotið óskarinn fyrir bestu aðalhlutverk.... hvað er málið???

Er einhver "Black awareness week" hjá þeim út í Bandaríkjunum núna eða hvað.... ef þessir tveir leikarar eru nú bara ekki með þeim leiðinlegustu sem til eru þá veit ég ekki hvað. Reyndar verð ég að játa að ég hef hvoruga myndina séð en aldrei hef ég séð þetta fólk vinna neinn leiksigur og forðast ég oftast eftir bestu getu að sjá mynd með þeim!!

 
fnuss.....
Ég þoli ekki þegar fólk hringir í gemsann manns með No number og skilur svo ekki eftir skilaboð og hringir ekki aftur. Svona á ekki að gera við forvitna manneskju eins og mig!!

 
:(
Ég finn það á mér að þetta á ekki eftir að verða góður dagur..... Símkerfið hérna er í einhverju fokki svo ég heyri ekki í svona helmingnum af fólkinu sem hringir inn, einn endajaxlinn minn þykist eitthvað vera að troða sér upp og er að drepa mig í gómnum og afleiðingarnar af því er hausverkur.. ví ví........

...svo vann ég nú reyndar miða í bíó í kvöld á 51st state en það er klukkan átta og þá er ég á námskeiðinu.

Annars er nú helst títt að í gærkvöldi flutti ég fullt af dóti til Gumma þar sem við verðum þar fram yfir páska því Jónas kærasti systur minnar var að koma heim í gær og því er ekkert pláss fyrir okkur heima.

 
HP
Byrjaði aðeins á fjórðu Harry Potter bókinni sem lofar bara býsna góðu! Enda verður maður nú að vera duglegur að lesa hana svo maður geti byrjað á Philip Pullman bókunum sem ég pantaði líka.

skólavesen
...en það er nú meira keisið að komast í eitthvað listnám, ég verð stressaðari og stressaðari með hverjum deginum. OK, það eru massífar kröfur í arkítektúrinn.... helst stúdentspróf af stærðfræðibraut en samt helst líka 38 einingar af myndlistarbraut. Svo þarf maður að sýna fram á einhverja afburðahæfileika en mér fannst ekki uppörvandi þegar ég fór á fund í listaháskólanum um daginn sem var um hönnunar- og arkítektadeildina og hvernig maður ætti að snúa sér við möppuna og svoleiðis. Þá sagði deildarstjórinn þarna í hönnunardeildinni, Guðmundur Oddur, að af þeim kannski 16 einstaklingum sem kæmust inn væru kannki bara 5-6 möppur sem sýndu einhvern talent og hinar 10 væru þá bara til að fylla uppí!!! Talandi um að lækka sjálfsálitið hjá fólki. En jæja, maður sækir bara um og sér til... en svo ætla ég nú líka að sækja um í fornámið í myndlistarskólanum í reykjavík sem er þá eins og að vera með 38 einingar af myndlistarbraut. Umsókninni á ég að skila núna á morgun og svo eru inntökupróf fyrstu helgina í júní, svo ég fór nú að spyrjast aðeins fyrir um inntökuprófið og það samanstendur víst af: hlutateikningu, módelteikningu, litaskynjun, þrívídd og almennri þekkingu á listasögu og samtímanum. OH my god!!! Þetta er allt svo voða fancy smansy eitthvað að maður veit stundum ekki hvar kröfurnar byrja og manni finnst liggur við að bara einhver undrabörn komist inn. Verður maður ekki bara að hugsa jákvætt........

always look at the bright side of life..durru duruduruduru :)

 
Hlölli klikkar aldrei :) mmm...

 
Apríl
Þetta verður alveg magnaður apríl... mikið actíon!!! 5. apríl á ég að skila inn möppu í listaháskólann þannig að dagarnir fyrir það verða örugglega þannig að ég loka mig af um páskana og reyni að mála dáldið. Svo er víst Reunion 6. apríl úr gaggó, það virðist nú ætla að vera ágætis þáttaka allavega ætla flestir sem ég heyri eitthvað í. Það verður örugglega ágætt, fínt að hitta fólkið sem manni langar að sjá og manni er hvort sem skítsama um hina. Svo er nú víst eitthvað í gangi helgina eftir það og síðan 20. apríl er óvissuferð í vinnunni!! Það er örugglega svaka stuð, mætum upp í vinnu um kl. 8:30 um moruninn held ég og verður eitthvað gaman, gaman til 14 makalaust en þá mega makar bætast í hópinn og þá verður meira gaman gaman til miðnættis....

...reyndar er dáldið leiðinlegt að Álfheiður, Jónas og Bergþóra Karen fara út á annan í páskum en Jónas kemur einmitt á morgun. Annars verða þau nú ekki lengi úti í viðbót en hann er í svona 11 mánaða mastersnámi og kom þau því örugglega í lok júní. Það er svo gaman að hafa þær heima. Bergþóra Karen er svo mikil rúsína, hún er farin að tala svo mikið og er alltaf svo ánægð að sjá mann :)

 
Bækur
Nú er gaman, gaman. Fékk bækurnar af Amazon sendar heim í gær, huggulegt að fá svona póstinn bara upp að dyrum :) Er nú ekkert byrjuð að lesa ennþá en ætla nú að byrja á Harry Potter í kvöld og svo er ég nú aðeins búin að kíkja á arkítektabókina sem er æðislega girnileg og með fullt af teikningum. Annars þarf ég nú reyndar að hringja í Tollinn á eftir þar sem þeir rukka 25% virðisaukaskatt fyrir bækurnar en ég veit ekki betur en að það sé nýbúinn að falla dómur í hæstarétti þar sem kom fram að skattur af erlendum bókum eigi að vera sá sami og af innlendum eða 14%!! Fussum svei.

Skellti mér í ljós í gærkvöldi og gleymdi ljósadisknum mínum heima... sniff sniff. Ótrúlegt að í þessu fáu skipti sem maður ætlar að hafa gaman af útvarpinu er varla hlustandi á það, annars var þetta samt kósý.

Vááááá....
Gleymdi næstum að minnast á það en ég og Gummi fórum að passa hjá systur hans á laugardagskvöldið og þar sem börnin voru bæði sofnuð horfðum við bara á videó í rólegheitunum. Áttum 24 á spólu þar sem ég er alltaf í myndó á fimmtudögum en það er nottla alveg snilldarþáttur og svo horfðum við á mynd sem Biggi&Dóra höfðu tekið en ekki náð að horfa á. Hún heitir Ticker og er skal ég segja ykkur LÉLEGASTA mynd sem ég hef séð í langan langan tíma. Man ekki einu sinni eftir neinni lélegri!!! Enda fór þessi mynd ekki í bíó og fær ekki nema 2.9 á imdb.com...................

 
Skundelí undelí
Þá fer þessi vika nú að klárast og í kvöld er nú bara stefnt á nett chill heima með famillíunni. Reyndar er nú Gummi greyið að fara í próf á morgun í aðferðarfræði en hann lærir nú ekki í allt kvöld þannig að ætli stefnan verði ekki tekin á vídeóleiguna og leigð einhver fjölskylduskemmtun, annars kíki ég nú kannki líka í ljós með Álfheiði systur, fá smá lit á kroppinn :) Mér finnst ótrúlega slakandi að fara í ljós þó það sé kannski ekki beint hollt fyrir húðina.. mmmmm... leggjast í bekkinn, setja City of Angels diskinn í og gjörsamlega slappa af. City of Angels diskurinn er bara alveg ultimate ljósadiskur og einnig yndislegur þegar maður fer í froðubað með kertaljós og allan pakkann..... grrr......

Annars fórum ég, Gummi og Hrund í bíó í gær. Skelltum okkur á Black Hawk Down sem var ekkert smá góð. Ég persónulega er svo blind á svona stríð og geri mér í raun aldrei grein fyrir hversu mikið dæmi þetta er, eins og þetta í myndinni í Sómalíu hvað það voru margir Sómalíubúar sem dóu en samt kom mér það líka á óvart um leið hvað það voru í raun fáir af bandarísku hermönnunum sem dóu miðað við hvað þeir voru þarna lengi. Skrítið fannst mér að Moby lagið heyrðist ekkert í myndinni þrátt fyrir að manni finnist það passa svona vel við og hafa mikil áhrif í auglýsingunni. En það er nú kannski ekki beint nýtt að mikið úr kynningum mynda komi aldrei fram í myndinni sjálfri sem er nú kannski bara ágætt þar sem oft er gjörsamlega búið að nauðga kynningunum.

Jæja, best að fara að gera eitthvað af viti, ætla að reyna að vera voða dugleg það sem eftir er dagsins. Það er nebbla miklu auðveldara að einbeita sér að einhverjum verkefnum seinni partinn þegar farið er að róast.

Kannski ég láti nú eitthvað frá mér um helgina en er nú oftast ekkert voða dugleg við að fara í tölvuna um helgar. Annars vona ég bara að ég fái bækurnar frá amazon strax eftir helgi.. ví ví .. þær eru lagðar af stað allavega og eru áætlaðar að koma hingað 18. - 20. mars :) Annars bara góða helgi..........

 
vinna
Það er nú greinilegt að það virðist ekki vera auðvelt að fá vinnu nú til dags. Vera leitar og leitar.... og svo hitti ég Ómar í gær á Vegamótum en ég, Hrund og Dröfn skelltum okkur aðeins á kaffihús í gær og Ómar var að segja að hann væri búinn að vera að leita að vinnu síðan 15. janúar og hefði meira að segja sótt um á Dominos!!! Djöfull er ég fegin að þurfa ekki að standa í þessu veseni nú að leita að vinnu fyrir sumarið :)

 
hmmmm.......
Ég verð nú að játa að ég er yfir mig hneyksluð yfir því að Magnús Ingi Einarsson fyrrverandi bekkjarfélagi minn skuli ekki sjá sig knúinn til að setja mig á tenglalistann sinn. Þetta er til háborinnar skammar!!!

 
Ohhhh.....
Ágústa og Dröfn voru svo miklar dúllur og komu með afmælisgjöf til mín í vinnuna.... Gáfu mér svona ýkt sætan cappuccino bolla úr Casa!!! Stórt knús :)

 
cameltoe.... ;þ
Þetta sá ég einmitt á síðunni hjá henni Katrínu sem ég kíki stundum á. Þetta er algjör viðbjóður og minnti mig á þegar ég var í verzló og við köllum alltaf einn kennarann okkar "sogpíku". Maður á nú kannski ekki að segja frá svona en þetta varð nú bara allt í einu svo ljóslifandi í minninu mínu...thíhíhí ég er stundum svo mikill púki :)

 
tíhí
Fékk málaratrönur í gær ala IKEA semsagt þá á ég enn eftir að setja þær saman, en það er nú bara pís of keik.
Hérna er svo kynlífstækjaprófið sem ég sá hjá henni Veru:



What Sex Toy Are You?

Annars ákvað ég nú að bæta hér inn einum tengli inn í ýmislegt en það er þessi ruglaða síða hér sem ég kíki stundum á.

 
...annars vil ég nú bara þakka öllum sem sendu mér kveðju á afmælinu mínu :)

 
Daddara....
Ég er búin að vera að leita að málaratrönum svo ég geti nú farið að mála eitthvað almennilega en það er nú meira hvað svona kostar allstaðar. Bara svona basic málaratrönur í Pennanum og Litir&Föndur kosta í kringum 20 þúsund. Svo mundi ég nú að einu sinni fékk ég lánaðar trönur hjá konu bróður míns en þær fóru nú eitthvað annað eftir að ég fékk þær og svo í ruslið en hún hafði nú bara búið þær til sjálf. Svo var ég nú farin að efast um að þetta myndi ganga og sótti leiðbeiningar á netið til að búa til svona sjálf, en þá voru það nú bara einhverjar mega flóknar leiðbeiningar. Ákvað ég nú að gefast ekki upp og minntist eitthvað á þetta í fjölskylduafmælinu mínu í gær og þá sagði bróðir minn: "Hefurðu kíkt í IKEA listann, er ekki allt til þar?" Ég sagðist nú hafa kíkt eitthvað í listann en ekki til að gá að þessu, ég fer fram og finn listann og viti menn, þar voru þessar fínu málaratrönur á 2.990 kr!!! og svo hringdi ég í morgun og þá voru þær meira að segja til :) jibbííí! Þetta hérna virðist stundum nebbla vera ansi vinsælt slagorð hjá þeim: "Ekki til en væntanlegt". En frábært að þeir eigi til trönur sem ég ætla sko að sækja mér beint eftir vinnu.

 

Samkvæmt kaffiprófinu er ég
Latte!
og samanstend af tvöföldum espresso og flóaðri mjólk.
Hvernig kaffi ert þú eiginlega?

 
Ég er nú kannski ekki voða vön að tjá mig hérna um helgar en ákvað að láta slag standa þar sem ég á AFMÆLI í dag. Nú er maður sko fyrst að verða gamall.... 21 árs ég skal sko segja ykkur það. Annars tók ég því nú bara rólega í gær og ég og Gummi horfðum á Moulin Rouge! og honum fannst hún bara fín. Reyndar er þetta nottla bara besta mynd sem ég hef séð og gæti horft á hana endalaust (enda var þetta í þriðja skiptið)

Pantaði mér líka bækur á Amazon í gærkvöldi sem ég fæ vonandi í byrjun þarnæstu viku. Pantaði mér fjórðu Harry Potter bókina ví ví :) , pantaði líka trilogíu eftir Philip Pullman sem heitir "Dark Materials" og á að vera í einhverjum svona Harry Potter fíling en þær hafa fengið svaka fína dóma og svo pantaði ég mér eina arkítektabók sem er vonandi áhugaverð.

Jæja nóg um það í bili, best að fara og undirbúa fjölskyldukaffið. Bakaði nú reyndar kaloríubombuna mína í gær og líka hrískökur. Ég og systir mín vorum í eldhúsinu liggur við í allan gærdag. En ætli maður verði ekki að taka aðeins til í herberginu sínu og svona svo það sé ekki allt út um allt.....

Chao!

 
hmmmmmm.... hvað ætli kosti að láta tappa aðeins smá þrýstingi af hausnum á sér??? Því ef þessi hausverkur smausverkur fer ekki að fara á ég eftir að tapa mér. Kannski gætir maður bara látið bora smá gat á hausinn, sett tappa í og í hvert sinn sem maður yrði var við hausverk tæki maður bara tappann úr og losaði þrýsting... það væri algjör snilld!!! En nóg af þessu bulli víst en þar sem það er nóg að gera í dag væri allavega fínt að setja hausverkinn í pössun á meðan.

Í dag er nú síðasti fyrirlesturinn á námskeiðinu mínu Grunnatriði byggingarlistar sem er búið að vera ansi skemmtilegt og fræðandi námskeið. Ég er líka búin að vera dugleg að glósa hjá mér í eins konar skissubók sem ég er nú bara nokkuð sátt við, ætla nebbla að skila henni inn með möppunni í listaháskólann. Það fer nú að líða að skilafrestinum en hann er 5.apríl. Skoðaði einmitt möppuna hjá einum sem er með mér á Formfræði&Hönnun námskeiðinu en hann var í hönnun í iðnskólanum og mér fannst það sem ég er komin með bara eins og litarbók miðað við hans, hann ætlar einmitt líka að sækja um í arkítektúr. Ég er bara orðin svo stressuð fyrir þetta allesammen, get ekki hugsað um annað þessa dagana. Svo ætla ég líka að sækja um í fornámið í myndlistaskólanum. Þar á að skila inn umsókn 22. mars en engri möppu heldur eru inntökupróf 1. og 2. júní...... úff. Það er nú bara eins gott að maður komist inn í eitthvað.... daddara :)

En svona á léttari nótunum þá er systir mín að koma heim á morgun með Bergþóru Karen litlu dúlluna hennar. Ég ætla einmitt að sækja þær út á völl.. ví ví. Bergþóra Karen er rúmlega átján mánaða og er farin að segja svo mikið. Þegar ég var úti hjá þeim í október og líka þegar þær komu um jólin þá var ég alltaf að segja við hana Daddara.... og nú þegar mamma hennar spyr hana "Hvað segir Erla frænka?" Þá segir hún Daddara... algjört krútt. Svo segir hún Lala, Pooh og ohhó enda er hún mjög hrifin af Teletubbies :) Jónas kærasti systur minnar kemur líka bráðum en hann verður aðeins styttra því hann er ennþá í skólanum.

 
Ég skil ekki hvar Vera finnur öll þessi próf......


Which tarot card are you?


Take the Bear Quiz by Krysten

Who's Your Inner Music Industry Diva? Find out @ She's Crafty

...en mér finnst þau alltaf jafn skemmtileg :)

 
Bíó
Ég og Gummi skelltum okkur í bíó í gær. Fórum á The Last Castle með Robert Redford og James Gandolfini. Unnum nebbla miða á hana :) Hún var nú bara fín, þó hún væri þessi týpíska bandaríska mynd með þjóðernisstoltinu og allesammen.

 



What is your meaning of life?



I'm Homer, who are you? by Lexi

....og samkvæmt þessu prófi sem ég sá hjá viktoríu er ég 28 % löt.

 
Jíííhaaaaa......
ég var að fá Moulin Rouge á DVD í gærkvöldi. Þórunn frænka var út í London og var svo góð að kaupa eina fyrir mig og eina fyrir Hrund. Ég og Hrund erum nebbla búnar að vera alveg veikar fyrir henni!!! Það verður nú gaman að horfa á hana heima hjá Gumma af því að hann er með svona heimabíó og hækka vel í græjunum :) ...ef hann fæst til að horfa á hana þar að segja... thíhí!

 
Brandari....
Þennan fékk ég sendan á maili áðan og mínum einfalda húmor leist bara ansi vel á:

Halló við erum tvær sæðisfrumur og heitum Óli og Bjarni, við leitum eftir eggjum........????? Vitið þið veginn??

Ha við??

Nei, við heitum Karíus og Baktus og við vinnum bara hérna!

 
"Nine-tenth of wisdom consists in being wise in time"
-Theodore Roosevelt-

 
Kærleiksbirnirnir eru yndislegir.....


See what Care Bear you are.

 
B-day
Fyrir ykkur sem ekki vita það þá er bjórdagurinn í dag. Til hamingu allesammen og ekki gleyma að halda upp á það :)

 
"Bíllinn minn, ég elska bílinn minn og því um bílinn minn syng þetta lag...."
....en það er nú bara greinilegt að enginn annar elskar hann Pjakk minn sem er nú kannski ágætt því annars ætti ég kannski engan Pjakk lengur!!! Þannig er mál með vexti að í hádeginu ákvað ég að fara út í sjoppu sem er nú kannski ekki frásögu færandi nema ég klæddi mig í jakkann og svona og ætlaði að hafa tilbúna lyklana...en ohó (eins og stubbarnir segja) engir lyklar í vasanum og ég hugsaði "silly me búin að læsa lyklana inn í bíl aftur" (það hefur nebbla gerst tvisvar áður). Ég ákvað því að krossleggja fingurna og vona að einhver hurðin væri ólæst. Ég labba að bílnum mínum og þegar ég kem nær sé ég að hurðin er opin, þá meina ég ekki ólæst opin heldur opin opin, lyklarnir í svissinum og farþegarúðan meira að segja skrúfuð smá niður. Í smá stund var ég ekki alveg viss hvort ég ætti að vera fegin að bílinn væri ekki læstur eða fegin að honum hefði ekki verið stolið!!! --- Reyndar eru nú kannski svona þúsund flottari bílar hérna fyrir utan en kannski ekki opnir með lyklunum í svissinum.
-Blondie strikes again-

 
Breiðholtið
Skoðaði Breiðholtssýninguna í gær sem var svona partur af arkítektanámskeiðinu mínu. Það var mjög áhugavert, kona að nafni Ágústa Kristófersdóttir fór með okkur þarna rúnt um sýninguna en hún er safnvörður þarna og hefur yfirumsjón með sýningunni. Það er alltaf gaman að skoða sýningar með leiðsögn :) Maður hefur kannski aldrei beint hugsað út í alla skipulagninguna og hugsunina á bak við allt þetta batterí. Hvernig hvert hverfi var pælt út af mismunandi arkítektum sem aðhylltust mismunandi stefnur og höfðu hver sínar hugsjónir. Mamma og pabbi byggðu nú þarna í Víkurbakkanum á sínum tíma en þá var ég auðvitað ekki til og er bara gaflari í húð og hár. En allavega fannst mér rosalega gaman að skoða sýninguna sem var ánægjulegt eftir vonbrigðin sem Breiðholtsþátturinn olli!

Uppistand
Ég og Hrund skelltum okkur á sportarann í gær á uppistandið með þeim Sigurjóni Kjartanssyni og Þorsteini Guðmundsson. Ég vil því þakka reykjavík.com fyrir að vera svo góðir að gefa mér miða :) Það var svaka stuð. Sigurjón var á undan en persónulega fannst mér Þorsteinn skemmtilegri. Hann er svona hressari og með svona skemmtilegri húmor. Það kom mér ekkert smá á óvart hvað Þorsteinn hefur grennst... hann gæti sko ekki leikið neinn pípara núna!!!